追蹤
陳秋白的台語文學佮翻譯......
關於部落格
一排一排熠熠的水花若目屎

 對畫布頂面滾落來……




 彼是歡喜欲靠岸的湧嗎?
  • 22326

    累積人氣

  • 0

    今日人氣

    1

    追蹤人氣

推薦讀詩─ 船浪顯影〈詩人:張德本〉

 

船浪顯影

瞑時坐佇記憶的海邊
少年時代的岸
佇海港對面
彼陣燈光無茲爾五花十色
是黑白電視轉播
美國太空人登陸月球的時代
色彩燦爛
是人人珍貴的期望

親像即陣兩台遊艇
「真愛號」「光榮號」
歸船攏攀滿彩色電火泡仔
海波浮沉
反射千萬粒鑽石的光影

毋過有外濟現代虛情的假意
要坐即隻「真愛號」去遊夜港
每日有外濟遭遇現實的屈辱
要坐即隻「光榮號」去吹海風

港的眠夢
船浪的顯影
自由理想確實真遠
現實的岸無介遠真緊就到

「光榮號」將歸群
受殘酷生活屈辱的人
送上岸
「真愛號」將歸群
受虛情折磨假意的人
送上岸

岸邊企的看板
用大粒心包小粒心
心會轉的看板
彩色燈火框起來
紅色心
禁電後
續反黑

引擎關掉後
即陣真愛佮光榮
攏睏佇緘靜的岸壁
一隻黑狗趴佇
海岸邊
看守幽深的暗瞑
 
相簿設定
標籤設定
相簿狀態